Ikastolaren historia
1968.urtean sortua,betidanik Martutene,Loiola, Astigarraga eta Ergobiako ikastola izan da. Hasiera batean, auzo bakoitzak bere ikastola txikia izan zuen, horrela, Martutenen, Loiolan, Astigarragan eta Ergobian Ikastola txiki bana eratu ziren. 1972. urtean denak bat eginez, Arantzazuko Ama Ikastola sortu zuten.
Aurreneko urte zail haietan ugariak izan ziren bidean topatutako oztopoak baina baita aurrera egiteko guraso eta irakasleen gogo, ilusio eta lanak. Hasiera batean Eskolaurreak eta OHOko aurreneko 5 mailak emateari ekin zion Ikastolak eta Donostiako beste 4 ikastolekin batera, Lizeo bat sortzea erabaki zuen: Jose Miguel Barandiaran Lizeoa.
1973. urtean Ikastolaren etorkizuna nolabait ziurtatu zuen gertaera garrantzitsu bat izan zen; Victor Amundarain izeneko Martutenearrak, argazkian ikusten den Villa Pilar musutruk eman baitzion Ikastolari, bertan, Oinarizko Hezkuntza Orokorra (OHO) koka zedin.
Ikastola zaharra. Villa Pilar
Ikastolak ikasleriaren gorakada nabarmena jaso zuen 80. hamarkadan eta OHOko goi zikloa emateari ekin zion, (6., 7. eta 8. mailak) horrela O.H.O. osorik ematen hasi zen. Jose Miguel Barandiaran Lizeoa, berriz, BBB eta UBI ikasketak emateko egokitu zen.
1973tik 1993ra, hogei ikasturtez, Villa Pilarren kokatu ziren Arantzazuko Ama Ikastolako oinarriak baina, ikasle guztientzako lekurik ezean, han eta hemen sakabanaturik beste zenbait egoitza ere erabili behar izan ziren: Agustinoen Etxea, Txomin San Sebastian Astigarragako eskola, Martuteneko Pedro Jose Irastorzaren egoitza e.a.
1993.urteko maiatzean ostintzeko ikastola guztiek bezalaxe,sare pribatuan jarraitzeko edota sare publikoan sartzeko aukera eta obligazioa izan genuen;beraz, ikastolako guraso eta langilegoaren Asanblada Orokorrean bilduz, sare publikoan sartzea erabaki genuen. 1994. martxoak 1etik aurrera ikastolaren titularitatea Administraritzaren (Eusko Jaurlaritzaren) esku gelditu zen, juridikoki ikastola publiko bihurtuz.
Egun bi ikastetxe ezberdin dira Haur eta Lehen Hezkuntzan: Astigarragako Herri Eskola eta Arantzazuko Ama Ikastola Martutenen. Bigarren Hezkuntzan, aldiz, Arantzazuko Ama Institutua mantentzen da, bertan, bai Martutene-Loiola eta bai Astigarragako ikasleak elkarrekin eskolatzen direlarik.