Belarritakoen erakusketa Astigarragan

Mater Museoko EKOFISH proiektuaren baitan, BIWI taldeak belarritakoak egin dituzte erabiliko plastikoez. Erabili dituzten prozedurak eta belarritakoak eta gainontzeko bitxiak erakusgai izan dituzte asteburu honetan Astigarragan. HEMEN duzue Onda Vasca irratian egin zieten elkarrizketa.

Ekofish proiektuak

Gure 3. mailako ikasleak itsasoaren babesaren alde lanean ari dira eta oso gauza interesgarri eta politak egin dituzte. Hemen bi proiektu ezberdinen web orriak:

 

Sartu eta ikusi gure itsasoari laguntzeko dauden hainbat modu. Bejondeizuela!

TOPICera bisita

Maiatzaren 26an 1.DBH-ko A eta B talde bikoiztuak Tolosako TOPIC txotxongilo museoa bisitatu dute. Liluratuta eta umorez ikusi dituzte bertan dauden mundu osoko txotxongiloak. Munduko istorioak antzezteko erabilitakoak, pertsonaiak, mota guztietakoak, aspaldikoak eta berriagoak, ikusgarri eta koloretsuak. Arretaz entzun dituzte gidaren azalpenak. Tolosa ezagutzeko ibilalditxo bat ere egin dute. Ekainean joango dira 1.DBHko C, D eta E taldeak.

 

Bizikleta ikastaroa 2. mailan

Maiatzeko bi asteetan zehar DBH2ko bi gelekin HIRIAN BIZIKLETAZ IBILTZEN IKASTEKO ikastaroa burutu dugu 6 orduz, TXITAren eskutik. Ikasleak gustura aritu dira lanean eta bizikletarekin hiriguneetan nola jardun behar duten ikasteko aukera izan dute. Hemen duzue 2C taldearekin eginiko jardueren laburpen bideoa:

 

Booktrailer Lehiaketako publikoaren saria jasotzen

Liburu Gaztea egitasmoaren 11. edizioko sari banaketa ekitaldira joan ziren Tabakalerara maiatzaren 19an.

Publikoaren Sarirako guztira, 1.243 bozka bildu dira aurten. Ikastetxeen kategorian, gure ikastetxeko OLIBAK taldeak irabazi du 139 bozkarekin, Care Santosek idatzi eta Miren Agur Meabek itzulitako Gezurra (Giltza, 2021) liburuaren booktrailerrarekin. Juan Kruz Igerabideren eskutik jaso dute saria Irati Zamakola, Naira Perez, Ainara Leon eta Irati Olveirak. Aparta giroa ekitaldian!

Irabazleek escape room baterako pasea eta liburu eta diskotan gastatzeko 100 euroko bonua jaso dute.

Eskerrak eman nahi dizkizuegu, berriz ere, bozketan lagundu diguzuen guztioi.

 

Hemen ikus dezakezue Sari banaketa ekitaldia

Hemen Lehiaketaz gehiago jakiteko aukera

34. Koldo Mitxelena Literatura Sariak jaso zituzten. Zorionak!

Maiatzaren 6an, udaletxean, Koldo Mitxelena Literatura lehiaketako sariak jasotzen izan ziren gure ikastetxeko saridunak:

MADDI SUSENENE, ZIHARA PAQUICO, EKHI URDANGARIN

Eta nahi izanez gero, ekitaldira bertaratzeko aukera eman zitzaien beren lan bikainagatik aipatuak izan ziren NAROA ARANZADI, NORA UBARRETXENA eta IRATI OLVEIRAri. 

 

ZORIONAK ETA JARRAITU HORRELA IDAZTEN ETA MARRAZTEN!

 

Jarraian dituzue ekitaldia ikusi ahal izateko bideoak eta argazki batzuk.

Hona hemen Laburpen bideoa

Hona hemen bideo osoa

Hona hemen argazi batzuk

 

Orokorra, bertan lehiaketako liburuxka ere eskura daiteke 34.Koldo Mitxelena Literatura Lehiaketa

5. Liburu Azokan gogotsu

Nazioarteko Liburuaren Eguna ospatzeko eta irakurzaletasuna sustatzen jarraitzeko, aurten ere, liburu truke azoka egin dugu. Gogotsu aritu dira ikasleak, sinopsiak irakurriz liburu aukeraketa egiten. Bestalde, Proiektu Komunitarioa arloan lanketa egin ondoren, 3.DBHak ipuin kontalari bihurtu dira, eta Lehen Hezkuntzako haurrei ipuinekin gozarazi diete aste honetako atsedenaldietan. Eta honez gain, Plastika ikasgaian orri-markatzaile dotoreak ere sortu dituzte. Irakurmenarekin gozatzen jarraitu!

Jon Arretxe idazlea gurekin

Jon Arretxe izan dugu hizlari 1.DBHn. Berak Afrikan egin izandako bidaietako argazkiak lagun, Beti iparralderantz nobelaz hitz egin digu. Batetik, 1.DBHkoek irakurritakoa hurbilagotik bizitzeko eta sentitzeko aukera bikaina eskaini digu, gainera, kasleen jakin mina asetu du galderak erantzunez. Eta bestetik, liburuak sinatzen ere aritu da: bai gelan irakurritako Beti iparralderantz, bai ikasleak irakurtzeko asmotan dabiltzanak, hala nola, Trumoiaren alaba, edota baita euren gurasoek irakurritako Jonen beste nobela batzuk ere, adibidez, Ostegunak, Ostiralak, Larunbatak, Tuparen seme-alabak... Eskerrik asko denon partez, Jon!!

Egun pasa Larraitzen, Larrunarriren magalean (DBH2)

Martxoak 31ean Txindokiko Itzalean pasa genuen egun ederra. Egun hotza baina bikaina irteera polit horretarako.
Natura sentitu genuen gure barnean, gure iritsiera ederra izan zen txorien kantuak eta zuhaitzen hostoak mugituta.
Ekintzak zoragarriak izan ziren, ekintza guztiek irribarre bat marrazten ziguten gure aurpegi guapoetan.
Egun ederra bukatzeko herrixka polit hartako (Abaltzisketa) parke zoragarri baten geunden mendi liluragarrien itzalpean.
(Testua: Malen E., Maddi eta Libe. 2C)

Galtzagorriko booktrailer lehiaketan zuen laguntza behar dugu!

 

BOZKATU!!

 

Apirilaren 30ean, igandea, Galtzagorriko Booktrailer Lehiaketan publikoaren bozketa egiteko azken eguna dugu. Parte hartu dutenen artean, lan batzuk bakarrik aukeratu dituzte Publikoaren sariaren bozketan sartzeko. Horien artean, bakarra dugu aurten Arantzazuko Ama BHIkoa, eta hau 3.DBH-Ako OLIBAK taldeak ekoiztutako GEZURRA liburuaren  booktrailerra da. 

 Beraz, bozkatzeko garaia iritsi zaigu, ea indarrak batuta, publikoaren bozketan irabazle bihurtzea lortzen dugun!

Eskertuko genizueke zuen botoa ematea.

 

Horretarako:

- Beheko estekan sartu.

- lehenbizi norbanakoen  lana aukeratu, bakarra dago, Jarraitu.

- Jarraian ikastetxeetako booktrailerra bozkatu behar da. Guk  OLIBAK   taldea aukeratu behar dugu ( GEZURRA  nobela). Aukeratu ondoren, eman jarraituri. Izen-abizenak eta korreoa eskatuko dizue,  bete eta bidali.

- Sartu eman duzuen korreoan eta Galtzagorriko mezua ikusiko duzu, onartu bozkatu nahi duzuela.

 

Hemen sartu eta bozkatu! 

 

https://www.ibbygaltzagorri.eus/liburu-gaztea/2022-2023/bozkatu

 

Eskerrik asko!

3.DBH Lizarran

Martxoaren 30ean abiatu ginen 3.DBHkoak Lizarrara, eta bertan pasa genuen gaua. Han piraguan ibiltzeko eta altuerako probak egiteko aukera izan genuen.  Gustura ibili ginen.

Koldo Mitxelena literatura lehiaketa

ZORIONAK!  AURTEN ERE BADITUGU GUREAN KOLDO MITXELENA LITERATURA LEHIAKETAN IRABAZLEAK ETA SARIDUNAK!

 

Koldo Mitxelena literatura lehiaketako 34. edizioan gure ikastetxeko SARIDUNAK izan dira:
- Bertsoa  D taldean - SUSENENE OIARTZABAL, MADDI "Eskolak" lanarekin.
- Komikia E taldean - PAQUICO COLOMA, ZIHARA “Urtebetetzea" lanarekin.
- Olerkia  E taldean- URDANGARIN  GALARTZA, EKHI  "Beldurra" lanarekin.

Bestalde AIPATUAK ere izan ditugu beraien lanen kalitateagatik:
- Ipuina  D "Ez da betirako" - ARANZADI BERASATEGI, NAROA
- Ipuina  E "Amonaren kaxa" - UBARRETXENA JIMENO, NORA
- Olerkia E "Jateko plazerra" - OLVEIRA RODRIGO, IRATI

 

Saridunak saria jasotzera joango dira  banaketa ekitaldira  maiatzaren 6an, eta senideek ekitaldian egoteko aukera izango dute alkate, epaimahaikide, musikari eta aurkezlearekin batera.

 

ZORIONAK GUZTIOI ETA JARRAITU SORTZAILE BIKAINAK IZATEN!

Ikasketa-bidaia Parisen

Hemen dituzue bidaiak eman dituen hainbat momentuen argazkiak eta gure irakasleek prestatu duten bideoa. Oroitzapen ederrak!

 

DBH4 Parisen

Iritsi dira hiri handira! Abentura hasi da! Ondo ondo pasa!

V. Liburu Azoka

Emakumeak errepidera!

Martxoaren 5ean, igandean, hainbat ikasle, irakasle eta langile Lilatoian parte hartu genuen. Kirola egiteaz gain, betiko giro mundiala gozatu ahal izan genuen. Beti ere ekitaldi honen helburu nagusia gogoan: emakumeak kirolaren bitartez ahalduntzea.

Inauteriak 2023

Hemen dituzue Palarrak taldeak antolatu zuen mozorroen aurkezpenen zenbait argazki. 2.C taldeak antolatu zuen ezkontzak irabazi zuen desfile onenaren saria eta 1.Dkoek eraman zuten mozorro onenaren saria. Zorionak parte hartu zuten guztioi! Ederki pasa genuen!

2023-2024 ikasturterako matrikulazioa: otsailaren 13tik 24ra

Aurkezpena: otsailak 22, asteazkena, arratsaldeko 18etan

 

Bertsolaritza Donostian

Urtarrilaren 10ean, otsailaren 6an eta 8an, 2. DBHko taldeak Bagera Euskara Elkarteak antolatzen duen Bertsolaritza ibilbidean ibili dira Donostiako kaleetan zehar. Hemengo bertsolaritzaren inguruko azalpenak eman dizkigu Bagerako Malenek. Eskerrik asko, Bagera. Euskara eta euskal kultura denon artean indartuz!

Euskal kultura geureganatuz

Asteazkenean 4. DBHko ikasleek Astigarragako Erribera antzokian musika emanaldi bat izan zuten. Mihise musika taldearen eskutik Euskal Kultura Geureganatuz izeneko emanaldiaz gozatzeko aukera izan zuten. Saio horretan, gure ikasleek euskal musikaren historian giltzarri izan diren kantu tipikoak zuzenean entzuteko aukera izan zuten. Kantu hauen bidez, Mikel Laboa, Negu Gorriak, Ruper Ordorika, Berri Txarrak eta antzeko musika taldeen lana ezagutzeko aukera izan zuten. Gainera, musikaren oinarrizko nozioak modu arinean ikasi zituzten: zer den sintetizadore bat, bateriaren atalak zeintzuk diren, zer diren distortsio padalak, kantu baten sortze prozesua zein den, etab. Ikasleek asko gozatu zuten Mihise taldeak eskainitako emanaldiarekin. Mila esker, Mihise!

Euskararen astea

Emakumeen aurkako indarkeriari EZ!

Emakumeen aurkako indarkeria desagerrarazteko nazioarteko egunean gure ikasleek ere parte hartu nahi izan zuten. Hemen bidali ziguten argazkia:

Euskaraldiko erronkak

Hauek dira gure ikasle eta irakasle batzuk Euskaraldiari begira dituzten zenbait erronka. Eta zurea?

 

Irakurketa saioekin, martxan berriz!

Urriaren 10ean ekin diogu, aurten ere, irakurketa saioei.  Hau da, iaz hasitako irakurmena bultzatzeko proiektuari.

Ikastetxe osoa, astean behin aldi berean, ordu erdiz, isileko irakurketan murgilduta izaten dugu, giro lasai-lasaian, bakoitzak aukeratzen duen irakurketarekin gozatzen.

Bizikletada 2022

Irailaren 22an Donostiako Udalak antolatutako Bizikletada jardueran parte hartu genuen DBH4ko ikasleekin. Bizikletaz Donostian zehar ibili ginen beste eskolekin batera bizikletan ibiltzeko bide seguruak eskatuz.